![](https://mediaekspert.az/manset/231898603.jpg)
Səadət Məmmədova 8 aprel 1977-ci ildə Ağdamda doğulub. Ermənistanın ərazilərimizi işağal etməsi nəticəsində ailəsi ilə birgə məcburi köçkün həyatı yaşayıb. 1994-cü ildə Bakıda S. C. Pişəvəri adına Humanitar Fənlər Gimnaziyasını bitirib. Həmin il Bakı Dövlət Universitetinin jurnalistika fakültəsinə qəbul olunub. 1994–98-ci illərdə bakalavr, 1998–2000-ci illərdə həmin fakültənin magistr pilləsində təhsil alıb. Televiziya və radio jurnalisti ixtisasına yiyələnib.
AzTV, AzTV2, LiderTV-də işləyib.
Lider TV-nin "SƏDA" xəbərlər departamentini
yaradıb və baş redaktor kimi departamentə rəhbərlik edib. Həm də ilk dövrdə xəbərlərdə
aparıcı, sonralar "167-ci saat" ictimai-siyasi analitik proqramının
müəllifi və aparıcısı olub.
Azərbaycan Dövlət İqtisad Universitenin internet
studiyasının yaradılması prosesində əsas şəxslərdən olub, universitetin
saytının yaradılmasında birbaşa iştirak edib, internet radiosunun layihəsini
hazırlayıb. Paralel olaraq İNTERNEWS NETWORK-də (əsas ofisi ABŞ-da yerləşən
beynəlxaq media şəbəkəsi) işləyib. İnternews network-un hazırladığı və Space
TV-də yayımlanan "Media və Mən" verilişinin redaktoru olub.
Bu layihə ilə yanaşı İnternews network-un BBC Dünya
xidmətinin Azərbaycan bölməsi ilə birgə layihələri reallaşdırmağa başlayıb.
Layihə BBC Azərbaycan xidmətində, Araz Radiosunda
və ANS ÇM-də yayımlanıb.
2005-ci ildə internews network-un Space TV-də
yayımlanan yeni layihəsində “Xətt” həftəlik informasiya-analitik proqramında
redaktor, bir neçə aydan sonra müəllif-aparıcı olub. Eyni zamanda 2005-ci ildə
mart-aprel-may aylarını əhatə edən, Böyük Britaniyanın Links beynəlxalq təşkilatının,
Beynəxalq Strateji Araşdırmalar Mərkəzi və İnternews network-un birgə layihəsi
olan və Space TV-də yayımlanan "Axşam debatları" tok-şousunda aparıcılıq
edib. Bu layihə oktyabr-noyabr aylarında ikinci mövsümdə də davam edib.
2005-ci ildə internews network-lə BBC Azərbaycan xidmətinin
bir illik böyük layihəsinin rəhbəri olub. Böyük Britaniyanın “Conciliation
Resources” təşkilatının dəstəyi ilə hazırlanan aylıq radiooçerklər silsiləsi öz
doğma torpaqlarından didərgin düşmüş azərbaycanlı məcburi köçkünlərin mənəvi-psixoloji
problemlərinə həsr olunub və bu layihə böyük uğur və rəğbət qazanıb.
2006-cı ilin iyununda AzTV-nin Xəbərlər redaksiyasının baş redaktoru təyin olunub. Eyni zamanda "Günün nəbzi", "Xəbərlər" proqramlarında aparıcılıq edib. 2007-ci ilin mayında AzTV-dən ayrılıb, dövlət qulluğuna keçib. 4 ildən çox Diasporla İş üzrə Dövlət Komitəsinin mətbuat katibi vəzifəsində işləyib.
2011-ci ildə Azərbaycanda ilk dəfə yaradılan HD
formatlı internet televiziyası – YurdTV-nin formalaşdırılması prosesinə dəvət
alıb. Layihə 3 il davam edib.
2015-ci il oktyabrında CBC beynəlxalq telekanalında
yeni yaradılan Azərbaycan Redaksiyasına rəhbər, baş redaktor vəzifəsinə dəvət
olunub. 2017-ci ilin dekabrında isə CBC TV-də Xəbərlər və İnformasiya
Departamentinin direktoru vəzifəsinə təyin edilib.
2021-ci ilin martından ATV kanalı prezidentinin
informasiya yayımı üzrə müşaviridir.
ATV-də yayımlanan "Ağdam və mən" sənədli-publisistik
filmlər layihəsinin müəllifidir.
2022-ci ilin sentyabrında Azərbaycan Mətbuat Şurası
İdarə Heyətinə üzv seçilb. Mətbuat Şurası sədrinin müavinidir.
2013-cü ildə Azərbaycan Jurnalistlər Birliyinin
"Həsən bəy Zərdabi" mükafatına layiq görülüb.
2019-cu ildə Dövlət Sərhəd Xidmətinin fəaliyyətinin
işıqlandırılmasında xüsusi fəallığına görə "Azərbaycan Sərhəd Mühafizəsinin
100 illiyi (1919–2019)" yubiley medalı ilə təltif edilib.
Prezident İlham Əliyevin 22 iyul 2020-ci ildə
imzaladığı sərəncamla milli mətbuatın inkişafındakı xidmətlərinə görə Azərbaycan
Respublikasının Əməkdar jurnalisti fəxri adını alıb.
Adının mənasını həyatında yaşadan dəyərli həmkarımız Səadət xanım! Keçdiyiniz yolun cəmi ömrünüzə yazılmış ən ağır olan yurdsuzluq dərdinə çox layiqli cavabdır. Fəaliyyətinizdəki yüksəliş kainata çatacaq səviyyədə olub deyə, o da göndərdiyinizi daha da gözəlləşdirərək həyatnıza qaytarıb – Siz vətənə qovuşdunuz: Ağdamdasınız! Ağdamlasınz! Ən ağır dərdiniz beləcə əriyib suya döndü. Kainat o suyu da pak edib, jurnalistkamıza nemət kimi verdi. Ona görə yazdıqlarınız, çəkdikləriniz bulaq təravətlidir, dözülməz istini bir andaca əsarətinə almaq gücündə olan nəsim mehidir, ruha və cismə sərinlikdir.
Məhz Sizlikdir. Bütün yolların işıqlı tərəfi Sizin səmtinizdir.
Yolunuz açıq qalsın, hər gününüz mübarək. SAĞLAM, AZAD, RAHAT yaşamaq həmişəlik nəsibiniz
olsun!
Mediaekspert.az