Almaniya Prezidentinin sosial media profilində əvvəl hüquqi, sonra mənəvi qanunları pozaraq edilən paylaşım iki aspektdən diqqət çəkir. Hər iki aspekt özünü demokratiyanın, insan hüquqlarının, mədəniyyətin beşiyi sayan ölkənin imicinə, onu idarə edənlərin siyasi fəhmlərinə zərbədir.
Prezidenti Administrasiyasının rəhbəri, Dövlət katibi Dörte Dinger paylaşımı texniki yanlışlıq adlandırıb və rəsmi olaraq Azərbaycandan üzr istəyib. Təbii ki, Almaniya Prezidentinin sosial media hesabını idarə edənlər var. O mənfur paylaşımın müəllifi cəzalanacaqmı? Əgər o adam nəyi harda paylaşdığını bilməyəcək səviyyədə naşıdırsa, prezidentin sosial media hesabını ona tapşırmaq nə dərəcədə düzgündür? Bu suallar açıq qaldığına görə, "texniki xəta" açıqlaması etiraf deyil, hadisənin mahiyyətndən yayınmaqdır.
Almaniya Prezidentinin sosial media profilində artıq keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub. Dərhal iki ölkənin Prezident administrasiyaları və Xarici İşlər nazirlikləri arasında təmaslar başlayıb. Almaniya tərəfi bu postun səhvən yerləşdirildiyini etiraf edərək onu dərhal çıxarıb. Almaniya Prezidenti Administrasiyasının rəhbəri adından ünvanlanmış məktubda baş vermiş bu hadisəyə görə üzrxahlıq ifadə olunaraq, məktubun mediaya verilməsinə razılıq bildirilib.
İkinci aspekt Almaniya Prezident Frank-Valter Ştaynmayerin Azərbaycana gözlənilən səfəri ilə bağlıdır. Federal Prezident səfərə 1:0 öndə başlamaq istəyirdi, 0:3 hesabı ilə uduzmuş duruma düşdü. Qondarma bayrağın paylaşımında məqsəd Almaniyanın regionda söz sahibi olaraq qaldığını göstərməyə xidmət edir. Ştaynmayerin Azərbaycandan sonra Ermənistana səfər edəcəyini nəzərə alsaq, o mənfur paylaşımın rəsmi İrəvanın yanında olduğunu göstərməyə cəhd kimi qiymətləndirmək məntiqli görünür. Əlbəttə zəif hesablamadır. Ümumiyyətlə, Avropa siyasətçiləri, lap elə birinci şəxslər səviyyəsində primitv siyasət yürüdürlüər ona görə ki, o ölkələr Avropa Birliyi adlı mexanizmin detalları rolundadırlar. Müstəqil siyasət AB-nin yedəyində əriməkdədir. Almaniya Prezidentinin oyunu bu dərəcədə primitiv quraması da belə bir aqibətin nəticəsi kimi görünür.
Yəqin ki, Frank-Valter Ştaynmayer Azərbaycanda səfərdə olanda "Qarabağ Azərbaycandır" kəlməsini söyləyəcək. Əgər söyləməsə, qondarma bayraq paylaşımının "texniki xəta" üzrü qəbahətdən daha betər görünəcək.
Onu da xüsusi ilə xatırladaq ki, regionda əməli ilə lider dövlətə çevrilən, bütün dünyanın zərrə də təsir edə bilmədiyi 30 illik işğal faktına 44 gün ərzində son qoyan Azərbaycan üzərindən ucuz şoular qurmaq mümkünsüzdür. Heç bir saat keçmədi, Almaniya prezidenti səviyyəsində yanlış mövqe sərgiləndiyi dilə gətirdi. Xarici siyasət belə olur.
Biri var, oynayıb udmaq, biri var, oynamadan qalib gəlmək. O bizik. Qalib olduğumuza görə oynamırıq!
Jurnalist Ekspert Mərkəzi
