Fransa Xarici İşlər Nazirliyi erməni qanunsuz silahlı
birləşmələrinin təxribatları nəticəsində aprelin 11-i Qarabağda yaşanan qanlı
savaşla bağlı fakta, məntiqə, beynəlxalq qanunlara sığmayan bəyanat yayıb.
Qarabağın Rusiya sülhməramlılarının müvəqqəti nəzarət
etdikləri ərazilərində gizlənərək terrorçu fəaliyyəti göstərən erməni
quldurları Xankəndi-Xəlfəli-Turşsu və bu
marşrutun şimalından keçən Xankəndi-Kosalar-Mirzələr-Turşsu yollarından
qeyri-qanuni silahlı dəstələrin döyüş mövqelərinin təminat və təchizatını həyata
keçirmək üçün mütəmadi istifadə edir, həmin yerlərə silah, hərbi texnika, canlı
qüvvə daşınır. Ermənilər həmin yollarda qanunsuz tikinti və təkmilləşdirmə işlərini
də intensivləşdirmişdilər. Bu, azmış kimi, aprelin 11-də Ermənistan silahlı
qüvvələri Qərbi Azərbaycanın Gorus rayonunun Dığ yaşayış məntəqəsi istiqamətində
yerləşən mövqelərindən Azərbaycan Ordusunun Laçın rayonu istiqamətindəki üzbəüz
mövqelərini minaatan və iriçaplı silahlarla atəşə tutdular. Hərbi
qulluqçularımızın sayıqlığı nəticəsində Ermənistan tərəfinin təxribatının
qarşısı qətiyyətlə alındı, atəş mövqeləri susduruldu.
Erməni quldurların xeyli itki verərək (sayı həmişə
azaldırlar, öz ictimaiyyətlərindən də gizlədirlər) qaçıblar və Azərbaycan
Ordusu əzəli, əbədi mövqelərində nəzarəti tam ələ keçirib. Savaşda ordumuzun 3
giziri şəhid olub.
Fransa XİN ermənilərin vəhşiliyinə don geyindirmək məqsədilə
guya manevr edib. Bizlərdə buna biclik deyirlər. Elmi baxımdan biclik gicliyin
antonimdir. Fransanın simasında isə məhz sinonimdir. Rəsmi Parisin bicliyi o qədər
bəsit və ikrah doğurandır ki, leksik mənaca bir-birinin əksinə olan sözlər də
onlarda eyni mənalı alınır.
Tərsinədirlər. Qərəzlidirlər. Həyasızdırlar…
Fransa XIN-in rəsmi saytına yerləşdirilən bəyanatın
fransız dili variantında bildirilir ki, Paris aprelin 11-də Ermənistan və Azərbaycan
sərhədində, Ermənistan ərazisinin Teq yaşayış məntəqəsi yaxınlığında baş
vermiş, hər iki tərəfdən 7 nəfərin ölümü və bir neçə nəfərin yaralanması ilə nəticələnən
zorakılıqdan dərin narahatlıq keçirir.
Bu hissin adı narahatlıq yox, riyakarlıq olar. Həmin
söhbətdir – antonim, sinonim məsələsi. Fransızsayağı yanaşmada narahatlıqla
riyakarlıq sinonim sözlərdir.
Bəyanatda “Ermənistanın ərazi bütövlüyünə hörmət və Azərbaycan
qüvvələrinin qoşunların təmas xəttinin Ermənistan tərəfindəki işğal olunmuş
mövqelərindən çıxarılması gələcək insidentlərin qarşısının alınması və regionda
davamlı sülhün əsaslarının qorunması üçün vacibdir” ifadəsi var. “Narahat” Fransa
Cənubi Qafqazı, Azərbaycanı, erməni xalqının özünü bir əsrdən çoxdur narahtlıq
işərisində saxlayan, 30 il rəsmən işğalçılıq edən, bu gün də eyni xislətindən əl
çəkməyən Ermənistanın ərazi bütövlüyündən danışır. Tarixən ərazisi olmayan,
qonşularının torpaqlarına göz dikən, bu gün Qarabağın bəzi yurdlarında terror
yuvası salan və sülh sazişinin bəndlərini yerinə yetirməyən Ermənistanın hansı
torpaq bütünlüyünə xələl gəlib?! Bəyanatdakı sərsəmləmədən belə çıxır ki, Azərbaycan
qüvvələri Ermənistanın mövqelərini işğal edib. Bunun adı sırtıq böhtandır, beynəlxalq
müstəvidə tam məhkəmə predmetidir.
Təsəvvür edin ki, “Sputnik Armeniya” saytı Fransa
XİN-in bəyanatındakı “Ermənistanın ərazi bütövlüyünə hörmət və Azərbaycan qüvvələrinin
qoşunların təmas xəttinin Ermənistan tərəfindəki işğal olunmuş mövqelərindən
çıxarılması” cümləsindəki “işğal” ifadəsini işlətməyib, bu abzası belə təqdim
edib:
“Ermənistan ərazi bütövlüyünə hörmət və təmas xəttinin Ermənistan tərəfində olan Azərbaycan
quvvələrinin tutduğu “pozitsiyalar”dan çıxarılması, gələcək insidentlərin
qarşısının alınması və regionda sülhün qorunub saxlanmasında böyük rola malik
olacaq”.
Bəli, cənab Paris! Azərbaycan öz torpağını işğal etməz,
oranı tutar – mövqelərini bərkidər ki, terrorçu ermənilər yenidən azərbaycanlılara
işğal faktı yaşatmasınlar, regionda sülhə tez nail olunsun, qan-qada, qırğın-mərəkə
həmişəlik sona çatsın, vətəndaşlarımız olan ermənilər də Qarabağa soxulan cinayətkar
soydaşlarının girovluğundan çıxaraq, Azərbaycan Konstitusiyasının onlara
verdiyi imkanlardan yararlansınlar, rifah işərisində rahat yaşasınlar.
“Ermənstanın ərazi bütövlüyü” ifadəsi şəklində təzahür
edən qondarma iddianı isə sıravi fransızlar eşidib, cənab Makrona gülərlər, onu
hoydu-hoyduya qoyarlar, necəki Fransada prezident Emanuelə qarşı etirazlar hər
ötən gün daha şiddətlənir.
Ermənilərin yaşadığı indiki ərazi belə, başqasınındır,
tarixi Azərbaycan torpaqlarıdır. Laçını atəşə tutan erməni silahlılarının təpələrində
gizləndikləri Dığ kəndini misal çəkək. Kənd Qərbi Azərbaycanındır. Fransa XİN
öz dilində yaydığı bəyanatda kəndi Tex adlandırır. Azərbaycan səfirliyin
Facebbok səhifəsindəsə bizim dildə “Dığ” yazıblar. Bunun adı yüngüllükdür. Özünü
tərəfsiz göstərməyə çalışan Makrongil işğalçını “işğala məruz qalan” adlandırırsa,
“biz erməniləri dəstəkləməyə gedirik” açıqlaması yayan Avropa İttifaqının
müşahidə missiyasının heç bir ehtiyac olmadan Ermənistana göndərilməsi kimi
ziyanlı oyun qurursa, Cənubi Qafqazda sülhün yaranmasına əngəl törədirsə,
çoxüzlü paralelepipedin eynisidir.
11 aprel hadisəsinə görə hazırlanan bəyanatda
vurğulanır ki, Fransa sərhədin Ermənistan tərəfində yerləşdirilmiş, töhfə verən
və gərginliyin azaldılmasında mərkəzi rol oynayan Aİ-nin müşahidə missiyasının
fəaliyyətini tam dəstəkləyir. Müşahidə missiyası kimə, nəyə töhfə verib? Ermənistana
gəldikləri gündən sərhəddə gərginlik artıb. Quldurlar Aİ-nin 50-si silahlı olan
100 nəfərlik heyətinə güvənərək təxribatları intensivləşdiriblər. Ermənistan bu
missiyanı təcavüskar siyasətinin tərkib hissəsinə çevirir.
Məlumata görə Ermənistan XİN aprelin 11-də Aİ müşahidə
missiyasının komandiri Markus Ritteri Dığ kəndi istiqamətindəki erməni mövqelərinə
gətirmək üçün nə qədər dilə tutsa da, istəyinə çatmayıb.
Dezinformasiya da ola bilər. Məqsəd “ermənilərə qulluq etmirik” görüntüsü yaratmaqdır. Tutaq ki, doğru xəbərdir. Müşahidə missiyası insident baş verən əraziyə getmirsə, monitorinqi necə aparacaq? Onların Ermənistanda gicəllənmələrinin mənası nədir? Azərbaycan qarşı tərəflə Xocalıda sülhməramlıların vasitəsi ilə belə, görüş keçirməyə razılıq vermirsə, Aİ nümayəndələri təmasların qurulması prosesində hansı nüfuz sahibləridir.
Buyurun, o missiya da onlarlıq
deyil. Yerinə düşür, deməsəm olmur. Belədə soruşarlar Ermənistanda nə itiniz
azıb? Hakimiyyətləri on illərdir erməni xalqını uçruma atıb, Azərbaycan Vətən
müharibəsindən sonra zavallılara xilas yolu göstərir, nəinki göstərir, bu yolu
qurur, yaradır, niyə imkan vermirsiniz bədbəxtlər bəladan qurtulsunlar, region
da təmiz hava alsın! Təxribatçıları cəsarətləndirməklə
erməni xalqının düşdüyü uçurumu dərinləşdirirsiz. Özünüzü ATƏT-in Minski qrupu
kimi aparırsınız: ilərlə gəldilər, getdilər, ortalıqda yeyib, qıraqda gəzdilər,
bir də baxdılar ki, fotoya dönüblər.
Makronkimilər sinifinə daxil olanların pencəklərinin yaxasına yaraşan
fotoya.
Ceyhun
Musaoğlu
